Connect with us
Advertisement
Advertisement

Cymraeg

Fyfyrwyr yn derbyn ysgoloriaethau’r Coleg Cymraeg

Published

on

MEWN digwyddiad arbennig mae Prifysgol Cymru Y Drindod Dewi Sant wedi croesawu’r newyddion bod y nifer uchaf erioed o’i myfyrwyr wedi derbyn ysgoloriaethau gan y Coleg Cymraeg Cenedlaethol.

Yn ystod y flwyddyn academaidd hon mae 67 o fyfyrwyr y Drindod Dewi Sant a Choleg Sir Gâr wedi derbyn un o ysgoloriaethau’r Coleg. Er mwyn nodi’r llwyddiant hwn cynhaliwyd seremoni arbennig yn y brifysgol er mwyn cyflwyno tystysgrifau i’r myfyrwyr llwyddiannus.

Mewn cydweithrediad â’r Coleg mae’r brifysgol a Choleg Sir Gâr wedi buddsoddi’n helaeth yn ystod y blynyddoedd diwethaf mewn creu darpariaeth cyfrwng Cymraeg o’r newydd mewn meysydd megis Celf a Dylunio, Amaethyddiaeth, Astudiaethau Chwaraeon, Busnes, Blynyddoedd Cynna r, Gwaith Ieuenctid a Chymuned ac Astudiaethau Crefydd. Bellach mae’r rhan fwyaf o gyrsiau cyfrwng Cymraeg y Drindod Dewi Sant yn gymwys ar gyfer Ysgoloriaethau’r Coleg.

Dywedodd Gwilym Dyfri Jones, Pro Is-Ganghellor Cysylltiol Prifysgol Cymru Y Drindod Dewi Sant: “Rydym yn falch iawn bod cynifer o’n myfyrwyr wedi llwyddo i ennill un o ysgoloriaethau’r Coleg Cymraeg Cenedlaethol. Mae’r Brifysgol wedi ymrwymo’n llawn i ddarparu addysg o safon yn y Gymraeg a sicrhau bod gan ein myfyrwyr bob cyfle posib i astudio yn eu dewis iaith.

“Dros y blynyddoedd diwethaf rydym wedi buddsoddi’n helaeth mewn amrediad eang o feysydd er mwyn cynyddu ac ehangu’r ddarpariaeth cyfrwng Cymraeg yn y brifysgol. Mae’r Brifysgol yn cydweithio’n agos iawn gyda’r Coleg er mwyn datblygu addysg flaengar cyfrwng Cymraeg ac rydym yn parhau i gynllunio er mwyn sicrhau bod darpariaeth a chyfleoedd pellach ar gael i’n myfyrwyr yn y dyfodol.

“Roedd y seremoni yn achlysur arbennig iawn ac roedd hi’n wych i weld y holl fyfyrwyr llwyddiannus yn cael y cyfle i ddod at ei gilydd i ddathlu ac i gymdeithasu.”

Ychwanegodd Dr Hefin Jones, Deon y Coleg Cymraeg Cenedlaethol a oedd yn bresennol yn y seremoni: “Mae’n rhoi cryn foddhad i mi fel Deon y Coleg Cymraeg Cenedlaethol i weld cymaint y datblygiad sydd wedi digwydd mewn addysg cyfrwng Cymraeg ym Mhrifysgol Cymru y Drindod Dewi Sant yn ystod y blynyddoedd diwethaf. Hynny, ar draws ystod o ddisgyblaethau; o berfformio a’r celfyddydau cain, i fusnes ac addysg gorfforol. Mae heddiw yn uchafbwynt i’r datblygiadau hyn – rhannu’r nifer fwyaf erioed o Ysgoloriaethau’r Coleg Cymraeg Cenedlaethol ymysg myfyrwyr Cangen y Drindod Dewi Sant.”

Continue Reading
Click to comment

Leave a Reply

Your email address will not be published. Required fields are marked *

Cymraeg

“Dyw’r boen byth yn diflannu”

Published

on

Y Ditectif: Gyda Mali Harries

FE FYDD cyfres S4C Y Ditectif yn cael mynediad ecsgliwsif i dystiolaeth yr heddlu a chyfweliadau pwerus gyda’r ditectifs a’r teuluoedd wrth i’r actor a’r cyflwynydd Mali Harries ddychwelyd i edrych ar saith achos o lofruddiaeth o nos Fawrth, 24 Ebrill ymlaen.

Ymysg yr achosion mae Mali yn eu holrhain mae llofruddiaeth Connor Marshall, 18 oed, fu farw ar ôl ymosodiad treisgar arno ar noson allan ym Mhorthcawl; ymchwiliad Operation York, pan gafodd Mark Mason ei drywanu 22 gwaith mewn hanner munud yn Y Rhyl, a llofruddiaeth Betty Guy, menyw 84 oed o Sir Benfro y credwyd am flynyddoedd iddi farw o achosion naturiol cyn i dystiolaeth newydd ddod i’r amlwg.

“Yn y drydedd gyfres, rwy’n cwrdd â mwy o deuluoedd y dioddefwyr a gweld shwd maen nhw’n dygymod ac yn gorfod byw gyda’r hyn sy’ wedi digwydd i’w plant nhw,” meddai Mali Harries, sy’n adnabyddus am chwarae rhan DI Mared Rhys yn y gyfres Y Gwyll/Hinterland ymysg rhannau blaenllaw eraill mewn cyfresi drama a ffilmiau.

“Beth dwi wedi ei ddysgu yw bod y boen byth yn diflannu a’r boen ddim yn mynd gyda’r achos llys, mae’r teuluoedd ‘ma yn gorfod ffeindio ffordd eu hunain i ddelio ’da’r peth a gorfod cario mla’n gyda’r golled enfawr.”

“Yn y drydedd bennod dwi’n cyfarfod mam Connor Marshall, y bachgen 18 oed a gafodd ei drywanu i farwolaeth mewn maes carafanau ym Mhorthcawl yn 2015. Mae’n haunting meddwl beth ddigwyddodd i fachgen mor ifanc oedd yn y lle anghywir ar yr amser anghywir. Fel Mam ro’dd clywed Nadine Marshall yn sôn am y dilema o eisiau rhoi rhyddid i’w phlant ond fel ma’ peryglon yn gallu dod gyda’r rhyddid yna yn drist iawn.”

Yn y rhaglen gyntaf bydd Mali yn teithio i’r Fflint i glywed pam y gwnaeth Heddlu Gogledd Cymru ail agor achos marwolaeth Janet Commins. Ddeugain mlynedd ar ôl i’r ferch 15 oed gael ei lladd, daeth tystiolaeth DNA i godi cwestiynau syfrdanol am yr achos.

“Roedd e’n anhygoel dysgu sut wnaeth y troseddwr fyw gyda’i gyfrinach am ddeugain mlynedd ar ôl lladd merch ddiniwed, a gadael i ddyn arall fynd i’r carchar a chael bai ar gam. O’n i’n methu credu bod e’ ‘di gallu cario mlaen gyda’i fywyd e ar ôl beth wnaeth e a byw yng nghanol yr un gymuned a theulu Janet Commins ar hyd yr amser.”

Mae gweld sut mae pob aelod o unedau datrys troseddau’r heddlu yn gweithio gyda’i gilydd yn agoriad llygad ac yn gysur i Mali.

“Mae cyfarfod y ditectifs yn rhoi ffydd i fi; er bod pethau erchyll yn gallu digwydd, mae yna bobl dda yn cario mlaen i drio darganfod y gwir,” meddai Mali.

“Dwi wedi dysgu bod dim un lle erbyn hyn i unrhyw un gadw cyfrinachau gan fod y ditectifs yn gallu gwrando a chlywed gyda thechnegau cudd i ddatgelu’r cyfan.”

Continue Reading

Cymraeg

Helpwch Parc Cenedlaethol gyda’r cynllun Noddi Iet newydd

Published

on

Warchod a gwella tirwedd: llwybrau troed Arfordir Sir Benfro

OS YDYCH chi’n mwynhau cerdded ym Mharc Cenedlaethol Arfordir Penfro a hoffech gefnogi’r gwaith caled a gaiff ei wneud i gynnal y dirwedd hon, sydd heb ei hail, gallwch helpu nawr drwy gyfrannu at y cynllun Noddi Iet newydd.

Bydd yr incwm a gaiff ei greu gan y cynllun, lle bydd placiau personol yn cael eu gosod ar ietiau ar hyd Llwybr Cenedlaethol Llwybr Arfordir Penfro, yn cefnogi gwaith Awdurdod y Parc Cenedlaethol i gynnal a chadw’r Llwybr 186 milltir o hyd a’r Parc Cenedlaethol ehangach.

Dywedodd Rheolwr Codi Arian Allanol Awdurdod y Parc, Nichola Couceiro: “Bydd plac personol ar bob iet a gaiff ei noddi, a bydd gennych chi’r opsiwn o noddi iet er cof am rywun oedd yn bwysig i chi, fel rhodd i rywun arbennig, drwy eich cwmni neu hyd yn oed yn eich enw chi’ch hun.

“Mae dros 100 o ietiau ar gael i’w noddi ar hyd Llwybr Cenedlaethol Llwybr Arfordir Penfro, sy’n golygu bod digonedd o leoliadau posib i ddewis ohonynt”.

Mae pob iet yn costio £600 i’w noddi, a bydd y nawdd yn para am gyfnod o ddeng mlynedd. Gallwch dalu drwy siec neu gerdyn debyd/credyd, drwy ffonio Tîm Gwasanaethau Cwsmeriaid Awdurdod y Parc Cenedlaethol ar 01646 624800.

Mae’r ffurflenni ar gael o wefan Awdurdod y Parc yn www.arfordirpenfro.cymru/noddiiet.

Dylech anfon y ffurflenni wedi’u llenwi i nicholac@pembrokeshirecoast.org.uk neu yn y post at: Awdurdod Parc Cenedlaethol Arfordir Penfro, Parc Llanion, Doc Penfro, Sir Benfro, SA72 6DY.

I gael rhagor o wybodaeth am y cynllun Noddi Iet, ewch i’r wefan uchod neu ffoniwch 01646 624808.

Continue Reading

Cymraeg

Byddai gwahardd allforio anifeiliaid byw yn annoeth, meddai UAC

Published

on

Glyn Roberts, UAC: Y byddai'n annoeth i gyflwyno gwaharddiad

BYDDAI gwahardd allforio anifeiliaid byw yn ‘hynod o annoeth’ o ystyried yr ansicrwydd ynghylch cytundeb masnach a thariffau amaethyddol ar ôl-Brexit, yn ôl Undeb Amaethwyr Cymru.

Ar Ebrill 9, galwodd Llywodraeth y DU a Llywodraeth Cymru am dystiolaeth ar waharddiad ledled y DU ar allforio anifeiliaid byw i’w lladd dramor – rhywbeth nad yw’n bosibl tra bod y DU yn parhau i fod yn rhan o’r UE, oherwydd rheolau masnach rydd yr UE.

Dywedodd Llywydd UAC, Glyn Roberts: “Yn naturiol byddwn yn ymgynghori ag aelodau ynghylch y mater hwn, ond ein safbwynt presennol yw y byddai’n annoeth i gyflwyno gwaharddiad ar allforion byw ar yr un pryd â chyflwyno tariffau enfawr posib ar allforion cig i’r UE.”

Dywedodd Mr Roberts y gallai gwaharddiad o’r fath fod yn ergyd i ffermwyr defaid, gan y gallai tariffau o tua 50% o werth cynnyrch fod ar gig ar ôl i ni adael yr UE, ac y byddai hyn yn dirywio masnach allforion cig dafad, sy’n cynrychioli o gwmpas traean o werthiant cig oen Cymru.

“Rydym yn gwerthfawrogi pryderon pobl ynglŷn ag allforion byw, ond rhaid inni gofio bod safonau lles cyfreithiol yr UE ymhlith yr uchaf yn y byd ac mae’r rhain yn berthnasol yma ac ar dir mawr Ewrop.”

Mae sylwadau Mr Roberts yn adleisio rhai Llywodraeth yr Alban.

Wrth ymateb i gynnig tebyg yn gynharach eleni, dywedodd Mr Ewing: “Gadewch imi fod yn hollol glir, dyma un fframwaith ledled y DU na fydd llywodraeth yr Alban yn cymryd rhan ynddo. Ni fyddaf yn cefnogi unrhyw beth sy’n creu heriau neu anawsterau pellach i’n sector amaethyddol neu’n rhoi amaethyddiaeth yr Alban o dan anfantais.”

“Felly ni fydd llywodraeth yr Alban yn cefnogi gwahardd allforion anifeiliaid byw, ond byddwn yn parhau i fod yn ymrwymedig i les pob anifail yn ystod cludiant sy’n cydymffurfio â’r safonau trylwyr cyfredol sy’n berthnasol – safonau a rheoliadau a ddarperir gan yr UE, sydd eisoes gyda’r gorau yn y byd ac yn ein hamddiffyn ni trwy’r mesurau iechyd anifeiliaid, planhigion a chemegol a galluogi ein cynnyrch i gael ei fasnachu ledled y byd.”

Dywedodd Mr Roberts fod y pryderon ynghylch y cynigion yn yr Alban yr un fath â’r rhai yng Nghymru, ac y byddai unrhyw waharddiad o’r fath yn niweidio ein buddiannau ni yn anfwriadol.

Continue Reading

Trending

FOLLOW US ON FACEBOOK