Connect with us
Advertisement
Advertisement

Cymraeg

Mynd yn addas ar gyfer y dyfodol

Avatar

Published

on

Screen Shot 2016-04-25 at 14.27.59MAE CHWARAEON Cymru, mewn partneriaeth â Llywodraeth Cymru, wedi lansio Glasbrint newydd ar gyfer creu cyfleusterau modern, addas i bwrpas, cynhwysol a chynaliadwy ar gyfer chwaraeon a hamdden egnïol ledled Cymru.

Datblygwyd Cyfleusterau ar gyfer Cenedlaethau’r Dyfodol:

Glasbrint ar gyfer chwaraeon a hamdden egnïol yng Nghymru gan ymgynghori â phartneriaid allweddol, gan gynnwys Awdurdodau Lleol, Cymdeithas Llywodraeth Leol Cymru, Cyrff Rheoli Chwaraeon Cenedlaethol a Sefydliadau Addysg Uwch ledled Cymru.

Ei nod yw bod yn fan cyfeirio fel sail i benderfyniadau tymor hir a chynaliadwy ynghylch cynllunio, darparu a chynnal a chadw cyfleusterau chwaraeon a hamdden.

Dywedodd Graham Williams, Dirprwy Gyfarwyddwr Chwaraeon Cymunedol yn Chwaraeon Cymru: “Rydyn ni’n gwybod y bydd cael cyfleusterau cynaliadwy, o ansawdd uchel, yn allweddol er mwyn annog mwy o bobl i fod yn fwy egnïol yn amlach.

“Er mwyn cyflawni hyn, mae’n rhaid cynllunio yn y tymor hir fel ein bod ni’n gallu bod yn siŵr bod y cyfleusterau’n diwallu anghenion cymunedol yn llawn, nawr ac yn y dyfodol. Mae’n rhaid i ni bennu ‘profiadau cyntaf’ o ansawdd uchel fel blaenoriaeth allweddol a dyma pam mae sicrhau darpariaeth briodol ar lefel ysgol mor bwysig, ochr yn ochr â chanolbwyntio ar ddatblygu cyfleusterau sy’n cynnal y brwdfrydedd hwnnw dros chwaraeon yn yr ysgol pan mae pobl wedi aeddfedu i fod yn oedolion.

“Pwrpas y casgliadau a’r argymhellion yw herio a dylanwadu’n gadarnhaol ar benderfyniadau yn y dyfodol. Rydyn ni’n cydnabod bod angen newid mawr yn y dull o ddarparu cyfleusterau ond rydyn ni’n hyderus y bydd eu hymgorffori yn y gwaith cynllunio’n arwain at gyfleusterau modern, cynhwysol, hygyrch ac effeithlon sy’n diwallu anghenion lleol ac yn annog mwy o gymryd rhan mewn chwaraeon a gweithgarwch corfforol.”

Dywedodd y Dirprwy Weinidog Diwylliant, Chwaraeon a Thwristiaeth, Ken Skates: “Rydyn ni eisiau annog mwy o bobl i fod yn egnïol yn gorfforol ac, yn bwysicach na dim, mwynhau cymryd rhan mewn gweithgareddau chwaraeon. Er mwyn gwneud hyn mae’n rhaid i ni wneud yn siŵr bod pawb yn cael mynediad rhwydd i gyfleusterau chwaraeon a hamdden sydd o ansawdd uchel ac sy’n diwallu anghenion cymunedau.

“Rydyn ni’n cydnabod bod hwn yn gyfnod ariannol heriol ond mae’n bwysig ein bod ni’n gweithredu nawr er mwyn sicrhau bod gan genedlaethau’r dyfodol gyfleusterau priodol yn y llefydd priodol, er mwyn gallu goresgyn unrhyw rwystrau sy’n atal cymryd rhan. Nod y glasbrint yw cynghori pawb sy’n ymwneud â dylunio, rheoli a chyllido cyfleusterau chwaraeon a hamdden i feddwl yn wahanol a chynllunio’n strategol fel bod pobl o bob gallu, oedran a chefndir yn gallu mwynhau cymryd rhan mewn chwaraeon ac elwa o’u manteision.”

Mae profiad o ansawdd uchel i gwsmeriaid yn flaenoriaeth allweddol wrth i Chwaraeon Cymru edrych tua dyfodol chwaraeon cymunedol yng Nghymru. Mae’r Glasbrint yn cyd-fynd â gwefan newydd ar gyfer chwaraeon cymunedol – www.ourambitiousjourney.sport.wales – a lansiwyd yr wythnos hon gan Chwaraeon Cymru ac sy’n gweithredu fel adnodd rhyngweithiol seiliedig ar ddata.

Mae’n darparu canolfan adnoddau i bartneriaid yn y byd chwaraeon, llywodraeth leol, addysg, y sector preifat a’r sector gwirfoddol, i’w defnyddio wrth gynllunio a datblygu chwaraeon cymunedol yng Nghymru.

Continue Reading
Click to comment

Leave a Reply

Your email address will not be published. Required fields are marked *

Cymraeg

Amser i gau’r bwlch ar Gymraeg yn sefydliadau

Avatar

Published

on

ER BOD sefydliadau cyhoeddus wedi perfformio yn well wrth gynnig gwasanaethau Cymraeg yn ystod 2019-20, mae ‘na le i rai sefydliadau wella eto yn ôl Comisiynydd y Gymraeg, Aled Roberts.

Mae’r Comisiynydd wedi cyhoeddi adroddiad yr wythnos hon sydd yn adrodd ar berfformiad sefydliadau cyhoeddus wrth iddynt ymdrin â’r Gymraeg. Mae’r adroddiad yn dangos bod perfformiad wedi gwella ar y rhan fwyaf o wasanaethau eto yn 2019- 2020 ond bod rhai agweddau sydd yn parhau i beri pryder i’r Comisiynydd.

Dywedodd: “Mae yna risg fod bwlch yn tyfu rhwng y sefydliadau sydd yn perfformio’n dda a’r rhai sydd ddim cystal, ac mae angen i bob sefydliad gymryd eu cyfrifoldebau o ddifri.

“A hithau yn bedair blynedd ers i’r sefydliadau cyntaf ddod o dan safonau’r Gymraeg, mi fyddwn yn disgwyl i bob sefydliad gwrdd â’r gofynion bob tro.

“Mae yna rai sefydliadau sy’n perfformio yn dda iawn, ond gydag eraill, mae gwasanaethau allweddol, megis ffôn a derbynfa, yn perfformio’n wael a heb gynyddu dros y blynyddoedd diwethaf. Dyma’r gwasanaethau lle mae angen buddsoddi mewn staff.”

Roedd yr adroddiad yn dangos fod 92% o lythyrau neu e-bost Cymraeg wedi derbyn ateb yn Gymraeg, fod opsiynau awtomatig dros y ffon ar gael yn Gymraeg 90% o’r amser a bod ffurflenni ar gael yn gyflawn yn Gymraeg 78% o’r amser.

Ond, dim ond mewn 46% o ymweliadau derbynfa y cafwyd gwasanaeth Cymraeg, a dim ond 55% o alwadau ffôn y llwyddodd sefydliadau i ddelio gyda hwy yn Gymraeg a rhoi ateb cyflawn yn Gymraeg.

Ychwanegodd Comisiynydd y Gymraeg, Aled Roberts, “Mi ddylai pob sefydliad fod yn ystyried pethau fel sefydlu tîm neu benodi swyddog sy’n gyfrifol am y Gymraeg, cynyddu faint o staff sy’n gallu siarad Cymraeg a chynnig gwasanaethau Cymraeg mewn ffordd sy’n golygu mai defnyddio’r Gymraeg yw’r opsiwn mwyaf naturiol. Mewn rhai amgylchiadau, er enghraifft cyfarfodydd sensitif ynghylch llesiant, dw i eisiau i sefydliadau ystyried cynnig gwasanaeth Cymraeg yn ddiofyn.

“Dw i eisiau gallu cymryd yn ganiataol fod gwasanaethau sylfaenol ar gael yn Gymraeg bob tro. Mi allwn ni wedyn ganolbwyntio ar ddyletswyddau eraill sy’n gwneud gwahaniaeth ar lefel strategol. Pethau megis penderfyniadau polisi, gan sicrhau bod sefydliadau yn ystyried effaith pob penderfyniad ar y Gymraeg, a gweithredu strategaethau 5 mlynedd cryf i hybu’r Gymraeg.”

Bydd y Comisiynydd nawr yn cyfarfod gyda’r sefydliadau yn unigol i drafod y canlyniadau a’r diffygion, a beth sydd angen digwydd er mwyn datrys a cheisio cau’r bwlch rhwng sefydliadau sy’n cydymffurfio yn dda a’r rhai sydd ddim cystal.

Continue Reading

Cymraeg

Y gorffennol yn dod yn fyw drwy hen ffilmiau

Avatar

Published

on

“MAE hen lun yn medru dweud llawer, ond mae hen ffilm yn medru dod â’r gorffennol yn fyw” meddai’r Prifardd ac Archdderwydd Myrddin ap Dafydd.

Bob wythnos ar Ffilmiau Ddoe, mae criw hwyliog o gyflwynwyr a gwestai neu gyfwelai yn gwylio detholiad o’r ffilmiau sy’n rhan o gasgliad Archif Sgrin a Sain Llyfrgell Genedlaethol Cymru. Detholiad o ffilmiau sy’n cofnodi digwyddiadau cymdeithasol, ffilmiau personol am deuluoedd, a thystiolaeth weledol o sut mae Cymru wedi newid dros y blynyddoedd. Yr wythnos hon, Myrddin ap Dafydd fydd yn cael y fraint o dyrchu yn y casgliad rhyfeddol hwn, a hynny yng nghwmni ei westeion Peredur Lynch a Beryl Vaughan.

Bydd Peredur Lynch, un o draethwyr huawdl y Babell Lên, yn cymryd golwg ar ffilmiau o Eisteddfodau Cenedlaethol ar hyd y blynyddoedd, gan gynnwys clip o’r Brifwyl yn Aberystwyth yn 1916, ffilm ryfeddol o Eisteddfod Machynlleth yn 1937, cofnod yr artist Charles Tunnicliffe o seremoni cyhoeddi Pwllheli 1954, a chlipiau o enwogion ar y Maes yn Y Drenewydd yn 1965.

“Da’ch chi’n gweld pobl yn rhythu ar gamera sy’n troi o’u blaenau, ac weithiau dan ni’n teimlo nad ydi pawb yn siŵr iawn sut mae ymddwyn o flaen y lens” sylwa Myrddin, wrth wylio clip o Eisteddfod Y Drenewydd 1965.

Bywyd cefn gwlad fydd yn mynd â bryd Beryl Vaughan, a chawn ymweld â Ffair Dalis 1914, sef ffair geffylau enwog Llanbedr Pont Steffan, diwrnod cneifio yn Y Foel, golygfeydd ardal Penderyn a Bannau Brycheiniog, a Choleg Hyfforddi Felinfach.

“Mae rhyw hud a hiraeth mewn gweld ein gorffennol yn dod yn fyw o flaen ein llygaid” meddai Myrddin. “Mae’n rhoi cyfle i ni fynd yn ôl yno, wel am sbel fach beth bynnag. Diolch bod ganddon ni drysorfa o archif yma yng Nghymru, a rheiny’n cael eu gwarchod a’u rhannu.”

Continue Reading

Cymraeg

Dogfen DRYCH ar restr fer Gwobrau Grierson 2020

Avatar

Published

on

MAE S4C a Chwmni Da yn falch o gyhoeddi bod dogfen Eirlys, Dementia a Tim ar restr fer Gwobrau Grierson 2020.
Y Gwobrau Grierson, sydd hefyd yn cael ei hadnabod fel The British Documentary Awards, yw digwyddiad mwyaf yng nghalendr dogfennau yn y DU. Mae’r gwobrau yn adnabod ac yn dathlu dogfennau sy’n profi safon, creadigrwydd, gwreiddioldeb a rhagoriaeth.
Mae’r ddogfen, a gafodd ei chynhyrchu gan Gwmni Da ar gyfer cyfres DRYCH S4C – cyfres o ddogfennau gafaelgar sy’n adlewyrchu bywyd yng Nghymru heddiw – wedi ei henwebu yng nghategori ‘Dogfen Sengl Orau – Cartref’.
Mae Eirlys, Dementia a Tim, rhaglen a gafodd ei ddarlledu’n wreiddiol ym mis Ionawr 2020, yn adrodd stori dau hen ffrind sy’n cwrdd unwaith eto ar ôl dilyn llwybrau go wahanol yn eu bywyd. Mae’r ddogfen yn rhoi portread gwahanol i’r arfer o berson sy’n byw gyda Alzheimer’s ac yn dosbarthu neges bwerus gan Eirlys, i beidio bod ofn.
Meddai’r Cynhyrchydd, Sion Aaron: “Rwy’n hynod o falch bod ein dogfen wedi cael ei henwebu. Mae gan Tim Lynn ac Eirlys Smith stori arbennig iawn i’w ddweud, sy’n wefreiddiol ac ar brydiau yn ddigrif. Mae dementia yn cyffwrdd gymaint o fywydau ac rydym ni wedi trio ein gorau i bortreadu’r realiti sy’n wynebu pobl fel Eirlys sy’n byw gydag Alzheimer’s cynnar.”
Meddai Dylan Huws, Uwch Gynhyrchydd y rhaglen: “Mae’r Gwobrau Grierson yn wobrau mawreddog ac mae hi’n fraint bod ymysg yr enwau mawr ar y rhestr. Mae hyn yn dangos ein bod ni’n gallu cynhyrchu straeon heriol ac atyniadol yn y Gymraeg sy’n sefyll ymysg y gorau yn y byd.”
Meddai Llinos Wynne, Comisiynydd Ffeithiol S4C: “Weithiau, mae ‘na gomisiwn sy’n wirioneddol yn cyffwrdd y galon. Mae Eirlys, Dementia a Tim yn enghraifft wych o hynny. Dyma raglen ddogfen a lwyddodd i roi portread gwahanol i’r arfer o berson sy’n byw gydag Alzheimers gan gyfleu neges bwerus a phositif i beidio bod ofn. Dwi’n hynod falch fod y ffilm hon wedi ei henwebu ac yn cael ei gweld ochr yn ochr gyda dogfennau mwyaf pwerus y DU. Llongyfarchiadau mawr i’r tîm i gyd.”
Gyda holl ddarlledwyr y DU yn gallu cystadlu, Eirlys, Dementia a Tim yw unig gynrychiolydd Cymru yng Ngwobrau Grierson.
Mi fydd y noson wobrwyo ar y 10fed o Dachwedd 2020 yng Nghanolfan Southbank, Llundain.

Continue Reading

Trending

FOLLOW US ON FACEBOOK